أخبارنا

احتفالاً بذكراهم

 شارك أهالي الشهداء في حوش الامراء  وبدعوة من لجنة المدافن ، في القداس الالهي الذي أقامته غلى نية  شهداؤها الابرار وذلك يوم السبت الواقع في  7/10/2007  احتفل بالذبيحة الالهية خادم رعية كنيسة مار الياس  حوش الامراء  الاب طوني برهوم  عاونه راعي كنيسة مار يوسف الاب يوسف نصر  والاب عماد بركه.

أقيم القداس في المدافن بالقرب من النصب التذكاري للشهداء حيث القى الاب طوني برهوم كلمة من وحي المناسبة . في نهاية القداس القى السيد ميشال جورج سعادة كلمة باسم  أهالي الشهداء جاء فيها :

آباء الأجلاء ، أصحاب الدعوة : لجنة مدافن حوش الامراء، ممثلي الاحزاب أهلي ورفاقي ، أبناء وعائلات الشهداء الكرام. بما انّو  هاللقاء هوّي لقاء عائلي وبعيد عن الجو الرسمي والرسميين ، رح اسمح لنفسي انّي اتوجه بهالكلمة باللغة العامية ورح تكون من القلب للقلب .

أنا بيشرّفني اني احكي بأسم عائلات الشهداء ، لأني بحس انّو في أكثر من رابط بيجمعني فيكم واهم رابط هوّي  انّي ابن شهيد ، صدقوني ما حدا بيعرف عن شو عم نحكي الاّ يللي عاش هالتجربة ، وما حدا بيعرف  عن مين عم نحكي  الا يللي حس بألم الفراق وغياب الأحبة .

عم نحكي عن أبطال ما سألوا شو ناطرن وما فكّروا بغنائم وصفقات ، ومشيوا ما تطلعوا الى الوراء ليعملوا حساب الربح والخسارة والكراسي ، مشيوا كان عندهم هدف واضح وواضح جداً هوّي الدفاع عن وجود مسيحي حر بهالشرق ليضل هالوطن الصغير منارة بتستمد شعلتها من دم الشهداء الأطهار، ويوم اللي ببطّل في دم يغذي هالشعلة رح تنطفي هالمنارة ويبطّل بلبنان يضوّي بهالشرق المظلم .

          من واجبنا إنّو نذكر شهداؤنا ومن واجبنا نصلّي لراحة أنفسهم ومن واجبنا نكرّمهم دائماً ولكن نحن شوعم نعمل لنطمنن إنّو القضية يللي استشهدوا من أجلها بعدها بخير وإنّو نحتا بعدنا أوفياء لهم وللقضية .

          بالسنة الماضية وبنفس المناسبة أطلقنا صرخة من هون من فوق هالضريح لكل المسؤولين والقيّمين على الوضع المسيحي بلبنان حتى يتوحّدوا واستشهدت بوقتها بكلمة للشيخ بشير الله يرحموا وقت قال :

إن شهداؤنا يشهدون عليكم فلا تشوهوا بتصرفاتكم صورة القضية التي ماتوا من أجلها فيكونوا قد استشهدوا مرتين .

الظاهر إنّو ما حدا بدّو يسمع ولكن نحنا مش لازم نسمح إنّو أبطالنا يستشهدوا مرتين . أنا برأيي إنّو نحنا المعنيين بهالأمر أكثر من غيرنا  وهيدي القضية كمان بتعنينا أكثر من غيرنا ، كرمال هيك لازم نقعد نفكر سوى ونتحرك سوى حتى نخللي يللي ما عم يسمع يسمع وإنّو إنجازات شهداؤنا أمانة ولازم نحافظ عليها وما حدا يتاجر فيها.

بدي إتوجّه بالشكر للآباء الأفاضل ولأهالي حوش الأمراء الكرام ،للجنة المدافن ولكل مين ساهم بفكرة او تصميم او بتبرع لانجاز هالنصب التذكاري يللي رح يخلّد شهداؤنا ويذكّرنا بقضيتهم.

أشكر حضوركم والله يرحم جميع الشهداء.